Սեմինար` Վանաձորում

Wednesday, 23 June 2010 16:49

Միջազգային օլիմպիական կոմիտեի «Համերաշխություն» ծրագրով Վանաձորում հանդբոլի մարզիչների համար անցկացվեց 9-օրյա սեմինար: Կազմակերպիչներն էին ՄՕԿ-ը, Հանդբոլի միջազգային ֆեդերացիան, ՀԱՕԿ-ը, Հայաստանի հանդբոլի ֆեդերացիան: Փաստորեն, մեր մասնագետները բարձրացրին իրենց որակավորումը, ստացան մարզչական միջազգային առաջին կարգ:

Սեմինարը վարեց Հանդբոլի միջազգային ֆեդերացիայի գործուղած եգիպտացի մասնագետ, պրոֆեսոր Մուհամեդ Քալեդ Աբդել Քադեր Հասան Համուտը: Վերջինս 60 տարեկան է, Եգիպտոսի հանդբոլի ֆեդերացիայի փոխնախագահը:

Նա հանդբոլի Ալեքսանդրիայի ակումբի նախագահն է արդեն և 15 տարի հանդբոլի միջազգային ֆեդերացիայի կողմից գործուղվում է տարբեր երկրներ, իր փորձն է հաղորդում հանդբոլի տեղի մասնագետներին: Համուտը 15 երկրում է եղել և առաջին անգամ էր սեմինար անցկացնում այս տարածաշրջանում: Ինքնին հարց կարող է առաջանալ, թե ինչ մակարդակ ունի հանդբոլը Եգիպտոսում: Բավական է միայն այն փաստը, որ Հանդբոլի միջազգային ֆեդերացիայի ներկայիս նախագահը` Հասան Մուստաֆան, Եգիպտոսից է: Մեկ տասնամյակից ավելի նա գլխավորում է այդ կազմակերպությունը:
Ընդ որում` Եգիպտոսի այս մարզաձևի տղամարդկանց հավաքականն ուժեղ է և պարբերաբար հանդես է գալիս աշխարհի առաջնությունների եզրափակիչ փուլերում: Եգիպտոսում կանանց հանդբոլը բարձր մակարդակ չունի, և դա էլ կապված է ազգային առանձնահատկությունների, մահմեդական դավանանքի հետ: Հանդբոլի միջազգային ֆեդերացիայի կողմից սեմինարավարի խորհրդատու էր նշանակվել Հայաստանի հանդբոլի ֆեդերացիայի փոխնախագահ, ֆիզկուլտուրայի հայկական պետական ինստիտուտի մարզական խաղերի ամբիոնի վարիչ, պրոֆեսոր Հարություն Մելքոնյանը:
Սեմինարի ծրագիրը հագեցած էր, մասնակիցները օրական երկու պարապմունք էին անցկացնում` տեսական և գործնական: Դրանք տևում էին 3-ական ժամ: Ի դեպ, 21 մասնակից սեմինարին մասնակցում էին ՄՕԿ-ի միջոցներով:
Իր հերթին, Հայաստանի հանդբոլի ֆեդերացիան աշխատանքներում ներգրավվելու հնարավորություն էր տվել ևս հինգ մարզչի: Եգիպտոսցի մասնագետը սեմինարը վարում էր անգլերեն, իսկ թարգմանչի պարտականությունը ստանձնել էր մեր լավագույն մարզիչներից մեկը` Արմեն Գևորգյանը, ով նախկինում մարզել է Հայաստանի հավաքականը, տևական ժամանակամիջոց բնակվել է ԱՄՆ-ում: Սեմինարին մասնակցում էին Հայաստանի բոլոր այն մարզերի ներկայացուցիչները, որոնցում կան հանդբոլի կենտրոններ:
Ի դեպ, ոչ մի մասնակից չէր հրավիրվել Գյումրիից: Բանն այն է, որ Հայաստանի երկրորդ քաղաքից ներկայացուցիչներ չէին եղել Հայաստանի տարբեր տարիքային խմբերի վերջին առաջնություններում, և մեր երկրի հանդբոլի ֆեդերացիայի ղեկավարությունն էլ անտարբերությանը համապատասխան վերաբերմունք էր դրսևորել և Գյումրիից ոչ մի մասնագետի չէր հրավիրել սեմինարին մասնակցելու: Փաստորեն, Հայաստանում աշխատում են հանդբոլի 47 մարզիչներ, և նրանց միայն մի մասին հնարավորություն կար ներգրավվելու պարապմունքներում:
Ընդ որում` ՄՕԿ-ը կարգ է սահմանել, որ այդ սեմինարներին պետք է մասնակցեն տեղացի առնվազն 10 մասնագետներ: Այնպես որ, այդ թվով մարզիչներ էր ներկայացնում Վանաձորը: Ի դեպ, ներկայացուցիչ կար նաև Քաջարանի հանդբոլի նորաբաց կենտրոնից` Անահիտ Հայրապետյանը: Վերջինս ֆիզկուլտուրայի հայկական պետական ինստիտուտի շրջանավարտ է, և, մասնակցելով սեմինարին, նա էլ հավաստագիր ստացավ: Ընդ որում` սեմինարի բոլոր մասնակիցներն էլ անվճար սնվում էին, լուծված էր նրանց գիշերելու հարցը:
Հիմնականում պարապմունքներն ընթացան Վանաձորի մարզապալատում: Ի դեպ, սեմինարն անցկացնող եգիպտոսցի մասնագետը հիացած էր այն պայմաններից, որ ունի մարզապալատը: Նա նաև հավատացած էր, որ Երևանում շատ ավելի լավ պայմաններ կլինեն հանդբոլի զարգացման համար, սակայն հետո, երբ Հայաստանի մայրաքաղաքում ծանոթացավ իրավիճակին, փոքր-ինչ հիասթափվեց:
Ծրագիրը նախապես էր կազմվել: Մարզիչներին գիտելիքներ տրվեցին, թե ինչպես պետք է պարապմունքները կազմակերպվեն սկսնակների խմբերում, պատանիների և աղջիկների ընտրությունն ինչպես պետք է իրականացվի, ինչպես է անհրաժեշտ բարելավել պարապողների տեխնիկատակտիկական պատրաստականության մակարդակը և այլն: Ի դեպ, սեմինարի բոլոր մասնակիցներն իրենց հետ տարան գծապատկերներ, տեսանյութեր, մեթոդական գրականություն և տեղերում ստացած փորձը, գիտելիքները կհաղորդեն իրենց այն գործընկերներին, ովքեր սեմինարի մասնակիցների թվում չեն եղել:
Հետաքրքիր է, թե սեմինարի ժամանակ ներկայացվե՞լ են այնպիսի բաներ, որոնց մեր մարզիչներն անտեղյակ են եղել: Հարություն Մելքոնյանը հայտնեց, որ բոլոր մարզիչներն էլ ֆիզկուլտուրայի հայկական պետական ինստիտուտի շրջանավարտներ են, և հանդբոլի հետ կապված այնպիսի բաներ չկան, որոնց քաջատեղյակ չլինեն: Բայց գործնական պարապմունքների կազմակերպման, հատուկ վարժությունների հանձնարարման հարցերում մի շարք նորություններ եղել են, և դրանց մեր մարզիչները նոր են ծանոթացել:
Ի դեպ, վերջերս Եվրոպայի հանդբոլի ֆեդերացիան Հայաստան էր գործուղել բարձրակարգ չեխ մասնագետի, որը Երևանում սեմինար պարապմունքներ էր կազմակերպել մեր մարզիչների համար: Հայաստանի հանդբոլի ֆեդերացիայի նախագահը պարզաբանեց, որ դա աջակցության «Սմարթ» ծրագրով էր, որի նպատակն էր բարձրացնել հանրակրթական դպրոցներում ստեղծված հանդբոլի խմբերի հետ պարապող մարզիչների որակավորումը:
Եվ քանի որ Հայաստանում վեց մարզիչ ունենք, ովքեր մարզում են 12 խմբի, ապա նպատակահարմար էր համարվել առիթն օգտագործել և սեմինարին մասնակցելու հնարավորություն տալ ավելի մեծ թվով մասնագետների, քանի որ հետագայում այդ ցանցն ընդլայնվելու է: Ինչ վերաբերում է վերջին սեմինարին, ապա նշվեց, որ դրա օգտակարությունը շատ մեծ է, և եթե հնարավոր լիներ այդպիսի սեմինարներ տարվա ընթացքում թեկուզ տասնյակ անգամ կազմակերպել, ապա մեր մասնագետները շատ բանով կշահեին:
Հ. Մելքոնյանը տեղեկացրեց նաև, որ պայմանավորվել են Մուհամեդ Քալեդ Աբդել Քադեր Հասան Համուտի հետ, որ հաջորդ տարի Եգիպտոսի ներկայացուցիչները մասնակցեն Հայաստանում կազմակերպվելիք` վարչապետի գավաթի խաղարկության միջազգային մրցաշարին: Նախատեսվում է, որ այն կկայանա կանանց հավաքականների միջև: Եգիպտոսցիներն էլ հրավեր են ուղարկելու, որպեսզի մեր երկրի կանանց ընտրանին մասնակցի իրենց երկրում անցկացվող կանանց միջազգային մրցաշարին: Եգիպտոսցի մասնագետին հանդբոլի Հայաստանի ֆեդերացիայի պատվոգիր և հուշանվերներ հանձնվեցին: Ի դեպ, նա ցանկություն հայտնեց կրկին Հայաստան այցելելու և հայերեն սովորելու համար բառարան խնդրեց:
Ինչ վերաբերում է հայկական հանդբոլում ներկայումս տիրող իրավիճակին, ապա հարաբերական անդորր է: Բանն այն է, որ թեև այժմ մրցումներ չեն անցկացվում, սակայն մերոնք նախապատրաստվում են սեպտեմբերին Երևանում կայանալիք վարչապետի գավաթի խաղարկության միջազգային մրցաշարին: Ընդ որում` արդեն հաստատել են, որ պատվիրակներ են գործուղելու Բելառուսի ներկայացուցիչները: Մասնակցելու են հավակնում նաև Ռուսաստանի, Վրաստանի, Իրանի հավաքականները:
Ընդ որում` Բելառուսի ներկայացուցիչներն ուժեղ թիմ են պատրաստվում մրցասպարեզ հանել, և այն գլխավորելու է օլիմպիական խաղերի չեմպիոն Ալեքսանդր Շևցովը: Ամենայն հավանականությամբ, այս անգամ մրցաշարը կկազմակերպվի մայրաքաղաքի «Միկա» մարզասրահում, քանի որ Երևանի «Դինամո» դահլիճի վիճակը ներկայումս բարվոք չէ: Ամեն բան նախատեսվում է կազմակերպել բարձր մակարդակով, և մարզասերներն ուշագրավ հանդիպումների ականատեսը կդառնան:
Ընդ որում` այդ փորձությանը Հայաստանի հավաքականը ներկայանալու է մարտական կազմով: Ֆրանսիայից Հայաստանի հավաքականի կազմում կընդգրկվեն այդ երկրում բնակվող և մրցելույթներ ունեցող 10-11 մեր հայրենակիցներ, 6 մարզիկ էլ նրանց կմիանա Հայաստանից: «Խնդիրն այն է, որ ֆրանսիացի մեր լեգեոնականները մրցաշարի մեկնարկից 7-8 օր առաջ Երևան ժամանեն, որպեսզի միասնական հավաքականը կարողանա համատեղ պարապմունքներ անցկացնել: Այժմվանից գովազդի, հովանավորների հետ կապված հարցերի լուծման մասին ենք մտածում, որպեսզի կարողանանք պատվով դուրս գալ այդ փորձությունից: Վարչապետի գավաթը կխաղարկվի երկրորդ անգամ»,- ասաց Հ.Մելքոնյանը:

Թեմաներ

Վարչապետի գավաթ

Սեպտեմբերի 1-5-ին Վանաձորում կկայանա Հայաստանի վարչապետի գավաթի խաղարկության միջազգային երկրորդ մրցաշարը, որին կմասնակցեն Հայաստանի, Իրանի, Բելառուսի և Վրաստանի հավաքականները: